Гордан Георгиев - ВМРО ДПМНЕ и Груевски напикани во глувчешки дупки
Скопје, 8. февруари (ИНПРЕС)
200 милиони евра не се ништо за нив! Не ги интересира што мислат архитектите, што мисли еснафот, што мислат Скопјани, што мислат нашите граѓани кои не живеат во Скопје, а не можат крај со крај да сврзат секој ден, рече на денешната прес конференција Гордан Георгиев, потпретседател на СДСМ.
До вчера се колнеа во референдуми, во гласот и мислењето на народот, а денес се напикани по глувчешки дупки и не одговараат на барањата на граѓаните, обвини Георгиев.
Во ситуација кога целокупната економија во државава се распаѓа, Груевски си замислил свој парк на стравот и ужасот на кој ќе потроши цели 200 милиони евра наши пари.
Јаболки се тркалаат по улиците, млекото се истура по патиштата, стечајците, професионалните војници, лозарите и наставниците не можат глава да дигнат од економската беда што им ја наметнаа. Зошто? Затоа што Груевски се разбудил едно утро и си рекол: сакам споменици, сакам кич, сакам да го поделам народот, да ги провоцирам Албанците, сакам барокни фасади, а не вистинско решавање на проблемите на граѓаните.
Оваа забеганост на ВМРО-ДПМНЕ мора да заврши. Уште еднаш го повикуваме Груевски, човекот што постојано вели дека најважно му е мислењето на народот, да свика референдум за Скопје 2014 и да ја слушне суровата вистина за тоа што мислат граѓаните за овој негов монструозен проект. Ако не свика референдум по ова клучно прашање за иднината на Скопје, но и за иднината на нашиот идентитет, тогаш веќе никој нема да му верува дека навистина се грижи за мислењето на народот.
Во меѓувреме, разгледувајќи ги останатите правни можности за стопирање на овој проект, СДСМ ќе поднесе барање преку пратеничката група за свикување на итна седница во Собранието по ова прашање, рече Георгиев. (Крај) | 
